یکشنبه 14 مرداد 1397

اَو بَرک

   نوشته شده توسط: خرم سعیدی    

" اَو بَرَک "

اُو سُو کِه آساریَل بیدن خَو
"شاوانو" دُودَرِ یَه دُونه مال
خُوسِ تَک بی وُ یَه مَه کِه گَوه زَی دَورِس
شاوِشایَک بِنِشَسِه سَرِ اَو .
پاپتی بال چَشمه
پا کِه اِینا وُ اِورداشت سَرِ گِل
گُل اِی دروَید وِ جاس
تا اِخَندس ، هَمُو گُمپ گُلس تیف اِی زَی
بُوِ خَندس دَرِ عَرطِس اِگُشی
کُلتِجَم خاک ولات، بُو خُوشِ اُو اِی دا
اَوِ چَشمه هَی اِتُورِست سَرِ کیف
رَنگ وُ ریِ هُونِه کِی دی منِ اَو
زَنگُلِ باد اِجُمنی همه جا حرفِ هُوبی
بُوندِیَل کِل اِی زَین
پِرپِروک دَور گلِ میناس اِی گشت
آساره رُهِ دیر
نَشمیِ ریِ هُو نی بُرد وِ ویر
لَچک الماس نماسِ اِی دی
گُلِ نوراس فرشنا، بُو اِنان مینِ چَکِس
آسمون خیفیِ هُونه کِه اِدی، شَرم اِی کِی
لِکِ اَورِ بِکشی ری تَپِ تیلونِس وُ خُوس...
دَس زَنُم ریم وُ اِگُوم وُوی تُوَه
پَیِ بیتا وُ چیا دی اِدَوِستیم وِ کیف
شَو کِه وَی ،کَه دیِ خَو
دَسِ نا ، نا همه مُون
مِنِ کُهرنگ، سَرِ رَه اَونِ گِریدن، اَمداد
خینِ سَوزی کِه اِبُردک "کارون"
تا گِرن جُون رَگ و پیوندامون
وا تَوَر زَیدن وُ رُمنینِِ کُهِ وُر مِنِ رَهس
اَوِ گِل کِردن وُ ماهی اِگِرن
مِنِ کِفتِ بِگِرین
غارتی اجدادی،دِربِدین وُر مِنِ مال
اَونِ جَرنین شُتِ زیری،بِرَسُونه خُوسه جَلد
گرمسیر تِشنه تَر اَز ایلاقِ
شاوانو ، دُودَرِ مال،لیک بِزَن دَس بِزِ ری
جُورِ " تَمتی " "گُلگیس " تُو بِکن ایلِ خَور
 
#خرم_سعیدی تابستان۹۷ خورشیدی

Ayapir2.ir
Telegram.me/khorram_saeedi


برچسب ها: شعر نو لری بختیاری ، شعر نو بختیاری ، شعر نو لری ، خرم سعیدی او برک ، شعر نیمایی بختیاری ،

پنجشنبه 11 مرداد 1397

دویتی مال

   نوشته شده توسط: خرم سعیدی    

" دویتی مال "
میشکال مال،یو چن رُو یَه دَنر
کُلهِ نادِ پَسِ بُرگ وُ وِ کیف
هُف منِ ساز اِکُنه
مُقُمِ " سرناز وُ گُلناز" اِزَنه .
گَلِ گُل، مینِ گُلِسونِ گلای کِلِ مال
اِوارازنین خُوسُون، جُورِ بهار
رَنگ وُ ری چی رُوِ نُور
کد و بالا،لِکِ چنداری خَیف
لُچک اُلماس نما، اُردی ارشفیا وُرمِنِ تیگ
جُورِ کوگ پُور،اِتَپن یا کِه وِ دَو بال اِزَنِن
مَیناییِ دُو سِه لُو وَروَنده
بَن سیزَن وِ رقات
دِلرُوا مُهره ی منجاس،دِل اِی بُورد وِ دیر
گُوِ دَسمال،شُراوِه دُو طرف
مُهره شَو تَو،مِنِ ناوَنده وِ نا
سینه ریزا پُرِ میخک هِد وُ عَمبَر بُوِ خُو
بایی بَند بَسِه وِ بایی چَپِس
چند تا مهره تیه،سوز مهره،دُو سِه تا قُرِ کُچیرِ نُرقه
دُو تا دَس،لِشگِ دِرَهد،بایم پُر گُل وِ بهار
سَوز وُ سیر دسمالا،وِ زِرِن قِرقِرِشا مینِ هوا
قِرِ شَولار قِری،تَهنه اِی زَی وِ هَمُو کوگِ دَری
بِسِدِ دِندونا،تا زَنِه کِل،مِثِ برف بِرچ اِزَنه
شَپَک اِی زَین دُورگَل وُ اِهَی گُل خُونِن
مَه گَوِه زَیده هِدن دَورِ بَهیگ مِنِ مال...

#خرم_سعیدی تابستان ۹۷ خورشیدی
Ayapir2.ir

Telegram.me/khorram_saeedi


برچسب ها: شعر نو محلی بختیاری ، شعر نو لری بختیاری ، شعر نو لری ، دویتی مال ، خرم سعیدی ،

یکشنبه 7 مرداد 1397

کرو

   نوشته شده توسط: خرم سعیدی    

" کُرَو "

زُلُوی کُهنه بِنا پیشِ بهُون
تیگِ بَسه هُو وِ دَسمالِ شَدِه
سرِ ری کاسه زُونی بنها
هُنُونِه جورِ عزیزی بِگِریده وِ بغل
مَهِ ریس لک لکی وُ نَم کشیده کهِ زَرد
مینِ هَرشتِ جَوونی بِتَکِسته نَینی
لَو کوو حُشک وُ تَفل
اِگُوهی تَپ تَپو وُ تاسه گریدن ناسه
خین جیر هید چنو کِه
تُهم غم زیدنه شُوم سر جیرس
یا خاک انداز هُلِ داغ
سُولِه کِردن بُنِ ناس
دل و دَسس دیه واس نی خوره با
هی سُرو خُونه وِ دیندا و نهاس
کُروِ مینِ دلس چینکه پُوکِست
دَس وِی کاردِ دری
زیر مینا گیلِ پَل خُوس بِگری
بُوُریدس وُ بنادس سر گورِ آرمونای دلس

#خرم_سعیدی تابستان۹۷ خورشیدی

Ayapir2.ir

Telegram.me/khorram_saeedi


برچسب ها: سعر نو لری ، شعر نو لری بختیاری ، شعرنو محلی لری ، شعرنو محلی بختیاری ، کرو ، خرم سعیدی ،

شنبه 16 تیر 1397

صو مال

   نوشته شده توسط: خرم سعیدی    

" صُوِ مال "

بُرگِ شَو جُورِ کُهی پیر، پُرِ تیگ کُرَو
مِنِ آسُونه گِلیس، تش وُ برق زیده و در
خط خطی وُ خَل وُ چَل،منِ سینه آسمون رَه ای رَه
پیش زی کِه افتو،بِدراهه منِ نافِ هو کئو پیر وِ دیر
نِشتِ نُور رَگ رَگی وُ ری بالا،پَنگ ای وند منِ ری اَورا
نَرمه باد پا سِوِک اَورانِ بِروندک جَلدی
تند وُ تند وَند خَورِ سال خشینه منِ مال
مُور جلال بیله بیگ
مینِ ای مَخملِ مَرغ،جَم وُ جُورن کلِ یک
گله چارپا منِ مَرغ هی اِچَرن
یَه دنر دینِ دِر ایدن،دَورِ پُشتِ رُونا
کیونومال،کچِه پُر خال وُ مُدام دَس وِ کار
تینِمِد وّند وُ نها بالش گئپی وِ سَرس
گَپِ مال شاهُونه زَیده تِکی
مَقَلِ وَرشو وُ قُوری شانشون بَست خَورده
جَعوه زارپیشه نهاده وِ وَرس
مَجمه زیر مَقَلِ هُو،مِثِ مَه لِرک ای زَی
استکانانِ نهانِ منِ لَبتَخت قشنگ
دِشلِمه قند سِبید " مَردَشتی"
عَرطِ چُوی تازه دَمِ " کلکته" ،پیتستِ وِ مال
اما مَیلتُون نَکشا ای گَویل
چَپِه نُون تیریِ گرم، بنهاده وِ طَوَق
تُوِ شیر،کرهِ گوسِند وُ یه پاله پُرِ ماست
عاسلِ کُه پُرِ فنجون،خایه ریز کوگ چالِه
ضَئف قیلونِ پیا آماده.
حُقه بافُور،تِکی داده وِ قوری کِلِ تَش
یَه نُخود تَحلی،اِدیسنی کِرِ سیلای حُقه
یَه گُلُو تَش گَمِ مَقاش اِبِلیوست وِ دیر
بادِ مِن پُف، جَم اکی مینِ گُلُپ
نُرقه کُو ساق بافور،بنهاده گُرِ لَو،هُف ای کی
سَرِ اَنگِشت رَسی سَر تحلی وُ بِچِرنی تَهِ دل
یَه دنر دینه قِلیسنید هَمس
وِ سُکُل نِفت یواش،هُونه ای داد وِ در
دِشلِمه قند بِزی من کُپ وُ نادس گُرِ لَو ای مِتِنی
یادِ بیت مَرحومِ " داراو" وَسُم 
" کُر دونگ مده،دولت وُ دنیا وِ خومونه" ایچو

#خرم_سعیدی تابستان ۹۷ خورشیدی

Ayapir2.ir

Telegram.me/khorram_saeedi


برچسب ها: شعرنو محلی بختیاری ، شعر نو لری ، شعر نو لری بختیاری ، شعر نو بختیاری ، خرم سعیدی ، صو مال ،

سه شنبه 5 تیر 1397

پیار دل کارون

   نوشته شده توسط: خرم سعیدی    


" پیار دل کارون "

غُروفُون کِی
سی دلِ دَی بلال
کارونِ گِرفگارِ گَژدیمِ عذاوِ روزگار
خَرس ماسس تیس
گژگُپِ گَپ سر دِلِس
وختی صدا شُرنگ شُرنگ بلال اشنه
تش اُفته گوشه پیار جیرس .
روزگار شیم
وا بُضغ گِلی گِر
جُلِ جدائی وَندِ وِ کُول کِنار
پرده دُرشتِ لَتی،
وا تَئمره کشی میون مون .
ملای جاوری خط چپ دار
سَر کتاوس ورداشت
سر تکون دا و بگو:
بد شگونی و شیمی زمون
نی پاهه چند دَمونِ دی
من ای دیار
اَر گوگری اَوه بیار
دَسا گِرمُست اَون
حُونه شَوِ وَتِوَر، ورکنه
چارچو هونه و کول کشن
افتو زلال زنه نِسه
#خرم_سعیدی تابستان۹۷ خورشیدی


برچسب ها: شعر نو لری ، سعر نو بختیاری ، شعر نو لری بختیاری ، پیار دل کارون ، خرم سعیدی ،

جمعه 14 اردیبهشت 1397

مُنُوُ دل

   نوشته شده توسط: خرم سعیدی    

" مُنُو دل "
مِن بهاری کِه همه هاچق اِبُون
خُومِ تَک مَندم وُ پاهیز دلم
هیچ مَندیرِ کسی نیم، کِه بِگُوسیم " آخَی "
مُو دلم ایخُو کِه تا، بِقِلیپُم منِ تاریکی دل
رَهِ پاکی بُوُرُم
دل مو تنگ اَویده سی خُوس
مَنِشینین کِلِ یُو، وُ بِدین دلداریس
گفت وُ لُفت خُونِه هِلین سی یه دَمُون دی ایسا
دلِ مُو پُرِ پُرس، شادی وُ ناشادی هید
خُومِ تُک مّندم وُ دنیای دلم
کِه کُرور تا وِ کُرور،هَوَس وُ دادن دل لیش وُ دُرو، هُو اِی اَرزِه خُوسِ تّک
خُوم تّک هیدم وُ تینای دلم
کِه پُرِس هید قشنگی وُ بّفا، یَه رنگی
تُنه دادم وِ هَمُو  " پیر مَهمی "
نَپِرُونین خَشیِ دلِ مُونه وا یَه " پِخی "

#خرم_سعیدی . بهار۹۷ خورشیدی
@khorran_saeedi
ayapir2.ir


برچسب ها: مُنو دل ، شعر نو لری ، شعر نو بختیاری ، شعر نو لری بختیاری ، خرم سعیدی ،

یکشنبه 26 فروردین 1397

پیر برف

   نوشته شده توسط: خرم سعیدی    

" پیر برف "

گُودِ بی گَفترِ مال
بئدِ شَستُم وِ زِمِسُون رَهده
یَه نَفس خُو اِ کشه،دَمِ سَرمانه اِبَنده وِ زِمین
اما امسال،پسِ هفتادم،آسمون باز زایی
برف چی چوقایی،مُلِشُون کُه نِه بِپوشوند وِ نُو
لِشگِ حُشک ،سر وِ هوا
چی قوا شِره دِره، وِ وَرِس اِز کرباس
مِنِ ری بِرچ اِی زَی،نور چی دَوریِ وَرشَو اِز دیر
بادِ لیله،وختی،پَره نازک برف،جورِ مینای یَه لُو دِر اِیدا
تیزی ای سرما،نُک وُ نُول آدمونه ای رچنی
چَشمه از او بالا،خُسه زَیده وِ َدرِ بی قَیتی
شیت وُ شات هی اکُنه رَه ای رِه
شُونِ گله،گلسه کی منِ اِشکفت وِ جا
گُوسیل، خُونّه اِتَینیدن جَلد
نَم وُ نُول دانِ سرِ گئر اِشکفت
تش وُ تُنگی درِ اِشکفت نهادن واکار
پَریُون، کتریِ من تُربِه دِرِیرد
برف پُر کی وُ نهادس سرِ تش
اگُم، میلتُون نَکشِه چُوی دَم کی
میشِ کُر چال، اِخَوسی وُ وِریسا سرِ پا
یَه بره نَر هُو بِزایی،بره کُر شَه وُ قَشی
پشم کوتا وُ هَمس فِرفِریِ با داده
شُون نیشت وُ هُونه دی کیف ای کی
بسم الا گرگ بگود
پالهِ اَوخُوری اِز تُربه دِرِیرد،گُونِ میشِ گری شیرِ جِک دُود پُرس
بال تَش بَردکیِ ناد وِکار
شَوکُله نه کِلِ بُورگا تَمنی،
دس کی گوشه نمِد،نَینِه دِرِیرد
سرِ کیف هُف من نی شیتس کرد
گلِ گیسِ هُو اِخُوند سی گُلِ مال.

#خُرم_سعیدی -بهار 97 خورشیدی
 Ayapir2.ir
telegram.me/khorram_saeedi


برچسب ها: پیر برف ، شعر لری بختیاری ، شعر نو لری بختیاری ، خرم سعیدی ، شعر نو لری ،

یکشنبه 26 فروردین 1397

ویر دینارون

   نوشته شده توسط: خرم سعیدی    

" ویر دینارون "

کَهدیِ اَور وِدّو، پَسِ کُه سَر بِکشی
کُه غم ، سَر وِ دِلِس اِی ساهی
دَرد،پُر سینه وُ بنگی وِ گِلی
باد چی جانداری،سینه خیز خُوس اِکَشی
اَورِ شَه ، وَی بِقِلیسنه افتو
تَش وُ بِرق زَی،وِ صِداس،هی اِلَرسست اُو کُه
رنگ وُ رِی نُور بُری بی اِز ترس
سایه چی نیزه دراز پا اِگُشی
تیفِ بارون، بگُشی دس زِ نو
جیرِ خاکِ کُرَو زیده، هُو کیفس گل کی
سَوز وُ سیر، نُک کُهِ دیر،دَفکِس زَی وِ زِمین
دُوَرِ مال اِدَونی بِرَسونه خُوسه وِس تا، کُر اَوه
یَه لِورگ باد وِ دَو،ریِ افتونه گُشی
چی ترازی مَه وُ افتو دُو سُوار گردنِ کُه.
دَشت وُ وَشت "دینارون"
پُرِ پُر بید وِ مَرغ
چُنُو خُو بی هُو کِه دی،هوشِ سَر بار ای کِی
"دُوِرا" ، دیر اِگُوی،گرگیه عاجز هو وِ خَو
افتو وُ کُه" گَهره" ، جُورِ گَگُو
دُو بغل زَینِه وِ یک
غاز غُلُنگا وِ رقات بال ای زین
بچه اِز دیر اِغارنی:خَچِه خَچه خَچه
بُوندِ یَل، بار وَنین مالِ خُومون.
پیرمردی من مال، تَینِمد وَنده سرِ گَهرِ هَلیک وُ ،وِ سرس هِید شُلال
دَسِ ناده مِنِ تیگ،آسمونه هُو نیره اِز دیر
کَیوِنو وا تَش وُ مَقَل اِرسی
مَجمِه وُ پاله پُر دُو وُ کره،نُون تیری
هُو بنا ، جَلد بِره تا کِه رَسُنه خُوسه وِ کار دیه.
سُگُوِ مال ، نشسه سرِ ناده سرِ دَس
مات بُردس وُ تیا زِل زَیده
کُه یَلِ سر وِ هوا، چی پلنگی پیسه
جا وِ جا خاک،اَوی چاک وُ اِگُوی
دِردِنه جُوه وَرس
مُرغِ زَرد ،جیجه یلس جَم زیرِ بال،وُ یکی رهده سرِ کُول وُ سُوار
پیته اِی کِی منِ خاکا یه خروس
نَر خرِ دیزه، سرس جُل شَلِه
بارِ هُو مشک وُ یَه مشکو سربار
وا اَوار، تنگ بِزیدن اُو بار
دُورِ چَک یَوَری بی دینداس
مشک چار اَنگِله نِه بَسه وِ کُول وا گِرچین
دَم بهون ، تیله زنی پَره اگرنی میِ بُز
اُو طرف چند کُچک دَور چاله
یه کُماچی وِ سرس،مَجمِه نهاده وُ  پُرِ  تش، اِبِلیوست زِ دیر
قاطرِ نیله وِ سُمدست اِکُفت ریِ زِمین اِی شِهنی
اُو زَون بَسه اِخُو حرف زَنه.
سرِ افتو جَرست
شَو بِرُمِست وِ لَم،رَهده وِ هُوش
زیر بیون وُ کُپ چاله پُر تَش
باد،لِک اَورِ گرید وُ اِکشیدس کِلِ مال
وسطِ چاله اَور،گلِ آساره وِ دیر
چی خاک انداز پُر تش
بُوَره نُوکرِ خان وُ بِنه منِ مَقل وَرشَو جلوس.
دَمِ صُو بُنگِ خروس،آسمون صاف وُ هَلیک
تُو اِگوی ریسه بِشُشته هُو وِ خَرس
آساره ریِ یَک اِی بُوسی
دیر اِی بین وِ یک،تُو اِگُوی رن سفرِ دیر و دراز
باز، اسبیدیِ صُو،هُو وِرِساده وِ خَو
کشکور هی اِکُنه، دَس اِساهه سرِ کُه
مین هَمی ویر وُ خیال
بُل گِریدم مُو، اِفیچُم منِ خَو
تی گُشیدم مُو و بیدم منِ شو.

#خُرم_سعیدی- بهار 97 خورشیدی
Ayapir2.ir
Telegram.me/ khorram_saeedi


برچسب ها: ویر دینارون ، شعر نو لری بختیاری ، شعرنو لری ، خرم سعیدی ،

دوشنبه 20 فروردین 1397

بی داد خونی

   نوشته شده توسط: خرم سعیدی    

" بیداد خونی "

ماتِه سَر زَی دَمِ صُو
ضَف قیلون، پا بَنِه ناد بُنا
جیتِ مَشک سَوزِ گِری وُ قَلادَریز کِی
داسِ وَرداشت وُ سُوهُونِ غَمِس وِس بِکشی
بادِ چَپ، گرمای ریتَون وُ هَمو غُولِ دِرو
یادِ سَوگُل کِه وِ سَرحَد اِزنه ناشتا دُو
بافِه بافِه غَمِ سَرد،سَر دِلِس پا اِی نا
گرمسیری سُرُوی وا نَمِ دل سَر اِی دا
"ای بی داد هَی"
" یَکین اِی خواسُم بی دادی سیم بِخُونه"
"بِکنه خارِ دِلُم- ای بی دادم هی- جاس گُل بِنِشُونه"

#خُرم_سعیدی بهار ۹۷ خورشیدی

Ayapir2.ir
Telegram.me/khorram_saeedi


برچسب ها: شعر نو لری ، شعر نو لری بختیاری ، شعرنو بختیاری ، بی داد خونی ، خرم سعیدی ،

یکشنبه 24 دی 1396

گرگ و گله

   نوشته شده توسط: خرم سعیدی    

« گرگ و گله »

دُو پَهلی وِ شَوگارِ شَه رَهده
گرگ خیال، وِ گله زَی
وِ ترس اَرباو
شَولیز وُ شَوچرِ وِ تَش کشی شُون
گیوه و چوقانِ سر قاش نا، نُتم اَوی
گرگ وُ میش صُو،
هُلا تَشِ ری وِ ری آسمون
حلا،تنه مَنِه وُ اَرباو 
گله من قاش وِ خَو.
#خرم_سعیدی زمستا۹۵ خورشیدی
Ayapir2.ir


برچسب ها: خرم سعدی ، شعر نو محلی ، شعر نو لری بختیاری ، شعرنو بختیاری ، گرگ و گله ،

جمعه 28 مهر 1396

مَلکِمیت

   نوشته شده توسط: خرم سعیدی    

" مَلکِمیت "

اَی بَرد شیر
دل دِه وِ مَتلم
مُو بَلگ زرد بلیطم
وا نم نم پُئیز
چی دال مندیرمه
خَلکن خَچه آسمون .
جیکِشتم،مین بلگ اور
وا تیغشت افتو وِ رُه کُه
چی بِنگشتی کِه بِوینه مار بَچَلس خُوره
سی تَریده ستمی کِه چی اَو رَوونه
وِ دیر ایا .

#خرم_سعیدی پاییز ۹۶ خورشیدی
 Ayapir2.ir


برچسب ها: خرم سعیدی ، شعر نو لری ، شعر نو لری بختیاری ، شعر نو بختیاری ،

پنجشنبه 23 شهریور 1396

گپِ گپ

   نوشته شده توسط: خرم سعیدی    

" گَپِ گَپ "

پیر مِردی کُپ چاله

تَشه شِمنی، سَرِ خارنی وُ اِگُو

جُورِ خَرمن کِه گُرازی نَزَنِس

تِجری پُر پَرزین،دَورِ لَوا،چه بغل زَیده وِ یک

حُوشه حُوشه گَپِ گِژ گُپ کِرده

وِ مِنِ تاپُو دل زِندونی

تُربه سُهرِ دلا وُر مِنِ کُول

دَورِ مالا کُم گُسنه گَشته

در گلستون کُرَوِ تَنگه ای پا وُ دلا

نِشترِ زَحم زَوون،واز کِرده هُو دهونس ایچو

اُو بُهون مهر وُ مَحبت وِ زَمونای نها

سَرِ اُو وارِ دلا رُومِسته

دَر دُرو هِید وِلنگ واز وُ دَرِ راس بَسه

تُف وِ شَیطونا با

اِی قد آدم کِه ایا مِن دنیا

نَلس آدم ری زِ نابودی اِره .

#خُرم_سعیدی تابستان۹۶ خورشیدی

Ayapir2.ir


برچسب ها: خرم سعیدی ، شعر نو محلی بختیاری ، شعر نو محلی لری ، شعر نو لری بختیاری ، شعر نیماری بختیاری ، گپ گپ ،

شنبه 18 شهریور 1396

شو و شون

   نوشته شده توسط: خرم سعیدی    

" شُون وُ شَو "

غیرزا ویقه ککاونگی و دیر
درنگشتی نبی
دَس وُ پا اَفتو وِ پِخو
زیر بهون آسمون اسیر .
مَه وارازنیده وِ فیس
چی بهیگ،پا سر آسمون نها
تَوِه زنگ خورد آسمون پرس تِنَه .
اُردی لشکر شو
جُور هَفی دُهونِس واز سی خَوردن
اِی گُوی ملایِ مال
طلسمس کرده قَدِ بَرد.
شُون گله بال قاش
نی شیتس گُر لو
بیتا " آ داراو" خوند و درد
" چطو نفتانه بردن،چطو حق مونه خوردن"
" یُو روخونه طلاهه"
" من ملکای ایما،شو و رو ادراهه"
" اویه جور لیره،اما صحاو ای او"
"و تشنهی امیره..."
داد و قال وس و مال
گله گرگی اوی...

#خُرم_سعیدی تابستان۹۶ خورشیدی

Ayapir2.ir


برچسب ها: خرم سعیدی ، شعر نو بختیاری ، شعر نو لری بختیاری ، شعر نو لری ، شعر نو محلی بختیاری ، شعرنو محلی لری ،

دوشنبه 23 مرداد 1396

مندیر نور

   نوشته شده توسط: خرم سعیدی    

" مَندیرِ نُور "

چُوپونِ آسمون
گله سه هَی کِی وِ شَوچَری
مِن بِکال اَو
چِرای بهون آسمون بِلیوست
پَلِ بُورس،زلف بهیگی وِ پیچ وُ تَو
خنجر فیروزهی بُرگس
دیوار وِ دیوار نور
دسس گردن دوای شو
مهتوِ وِ خو
زیر سایه چرتول آسمون
گو یو نشینیم مندیر رُوشناس.

#خُرم_سعیدی تابستان۹۶
Ayapir2.ir


برچسب ها: خرم سعیدی ، شعر نو لری بختیاری ، شعر نو لری ، شعر نیمایی بختیاری ، مندیر نور ،

سه شنبه 20 تیر 1396

چرای ور باد

   نوشته شده توسط: خرم سعیدی    

خرم سعیدی:
" چرای وَر باد "

اسبِ سیا "سیاوش"
یالسِ باد اَوشُوند
رکاوس پتی
سرس وِ زیر اِی شِهنی وُ دس اِی زَی.
"فرنگس"،سرو خُوند وُ ری بِکند وُ پَل بُری
شَو،حِقه بِشرنی 
مِه ی رَموک،مین اَوِ آسمون وِ دَو
پسِ هَف کُه اَور قام اَوی.
گمونُم خروسن سر بُرین
"رُسم" وِ خَو بمند
وای وِ حالِ چرای دَم بادِ ولات
چَند زرده غم وِ کُول وُ تینا.

#خرم_سعیدی تابستان۹۶ خورشیدی

Ayapir2.ir

Telegram.me/khorram_saeedi


برچسب ها: خرم سعیدی ، شعرنو بختیاری ، شعر نو لری ، شعر نو لری بختیاری ، چرای ور باد ،

یکشنبه 14 خرداد 1396

دالو شو

   نوشته شده توسط: خرم سعیدی    

خرم سعیدی:
« دالو شو »

شٙو،پٙسِ هٙف کُه سِه وِ خٙو
ویر روز،بلااویده مِن باد
پشت پوست شو
آساره یٙل پیر،اسیر
جُورٍ سٙرِ بریده وِ خٙو
نورِ سِوکِ مٙه،گوش تیز ای کی
دالوی گو:
گاشه سُوار اسبید پوش،
کیونوی صُو
پاپتی وِ ای برهوت
وِ پُشت شٙو درا
مین میدونِ شُمشیر شیون خین.

#خرم_سعیدی خورداد۹۶
Ayapir2.ir

Telegram.me/khorram_saeedi


برچسب ها: خرم سعیدی ، دالو شو ، شعر نو بختیاری ، شعر نیمایی بختیاری ، شعر نو لری بختیاری ،

جمعه 20 اسفند 1395

مال چواسه

   نوشته شده توسط: خرم سعیدی    


« مال چواسه »

جُورِ بازبازک اِبازن شِو وُ رُو
آسمون واز وُ فراق
شٙوِ پر رازِ نهاده سٙرِ شُون
جُورِ « هرکول» زمون.
دیِ شو بال اِگُشه
یابو آسارنه بٙسه سرِ سٙرد آخورِ کُه
لچک الماس نما نادِ وِ سر اِی دٙونه
شٙوکُله مٙه نِه نهاده گُر سر فیس اِکُنه
وا لِورگ باد صٙوق
گرگ لُوق ناد وِ دٙو
غولِ سایه وِ شتاو ای ورگشت
کاکونگ زیر شُکه
داغ دل ایخونه
یُو چِه مالیه دیه
کِه چنو دٙمبٙرده
همه چیس هید چواسه ایچو
ظلمونی بگریسونِ وِ چی «اسکندر»

#خُرم_سعیدی ۹۵خورشیدی
Telegram.me/khorram_saeedi


برچسب ها: خرم سعیدی ، شعر نو لری بختیاری ، شعر نو بختیاری ، شعر نو لری ، مال چواسه ،

چهارشنبه 4 اسفند 1395

امبار اندو

   نوشته شده توسط: خرم سعیدی    

:« پنجم اسفند،روز سپندگار مز،مصادف با روز جهانی زبان مادری»
«امبار اندُو»

اٙورِ شٙه،شُونه وِ شُونه هِدن،جُور دُوتٙرکِه سُوار
کُه ی پیر،پشت وِ پشتٍ یٙکن،نیم وِ تاریکی وُ نیم دیه رُوشِنن
اُو شوِ پا وِ رِکاو،وا حُنکی هِد حساو
پشتِ کُله کُه وِ دیر،جور یٙ دیو سیا،ریس و بالا نها
شٙو دینِ افتو وٍ دٙو،پشت بیاوون سُوار
مٙه نِه بِنٙه کِه چطو،پشت تُل وُ مُل وِ دٙو،شٙلِه وُ لُق اِی کنه جور یٙ اٙولاق پیر
تیلهِ مٙه نُوبٙتی،پُی سٙر وُ پاسُون پتی،تیف زنن یک یکی،مِن سر وُ ری آسمون
کهنهِ نورا سُوار،هی اِبلیون وِ دیر،جُق اِخورن مین یک جور سر مُورجِلال
زیر تل آسمون،زیده هُو زِل هٙر دمون
کدِ دلس بُوره وِ،زیر زیاتی بار
خرس وٍ مرزنگ رٙوون،جور جُو مٙرغُلون
هُو وِ گِمونس رسه،طاله بختس سیا،جور سر زلف شو
هی اِغِرمنه اگو:جور زمون نها،بازِ دلم مُفتلا
مو‌ وِ دٙو وُ نون وِ دٙو،جور جن وُ بسملا
گُوم گگوم مر چته،ای گُدٙره روزگار
غارنه وِ مٙزگ سر،هی اِگو ای کُر میر،قاوضی یا کور وُ کر

#خُرم_سعیدی زمستان۹۵ خورشیدی


برچسب ها: شعر نو محلی بختیاری ، شعر نو نیمایی بختیاری ، شعر نو لری بختیاری ، خرم سعیدی ، امبار اندو ،

جمعه 26 آذر 1395

دا

   نوشته شده توسط: خرم سعیدی    


« دا »

هُو کِه چین شولار قِریس 

طَهنه وِ گُمب گُل ای زی

گیلِ میناس،ری گُشون افتو بی 

شُرنگ شُرنگ بَن سیزنس 

زُلال چَشمه سارون ،

مُهره ی دِلروای مینجا بُن ناس 

دلِ افتونه اَو اِی کِی

جَوونیسِ وا لِخلِخه هام وِ پیری گره زَی 

اسبیدی تُرنس وِ ری سیاهیم.

جُوون وَرگَرنِ گرمِ تَنیر سینس 

هِرنگ دلم بی 

هُو سی مُو مایه حیاته نه اَو .

یه حرف وُ دُو حرف وانمم نا

شاهِ کشور وجیدمه وُ نُمس حَک دِلم 

سایه شادی وُ غَمُمه وُ دلگرمی افتو تَنُم 

سَکُو، وا بُضغِ گِلی گِر گِلامون کِرده 

مین آسمون خیال،دین جوونی بلا اویدس گرده

#خرم_سعیدی پاییز۹۵ خورشیدی


برچسب ها: شعر نو محلی بختیاری ، شعر نو لری بختیاری ، شعر نو لری ، شعر نیمایی بختیاری ، خرم سعیدی ، دا ،

یکشنبه 29 فروردین 1395

گره گلی

   نوشته شده توسط: خرم سعیدی    

" گره گِلی "

آلیده هِد هوای دل

پَنجه خیالِ عُرمِ سُوده

وِ بَرهُوتِ دل پیته

زَهر خَندِ زِندهی قیل

دلِ چی لِشگِ حُشگِ گینهِ كُهنه، پیرِ پیر

سیاپوشِ ویرِ جُونِ وِ گِل نِشَسه

بیخِ گِلی گره گِر

بُضغِ زِندونی كاسه سَر

اِشكم واكُنه

تَپ وُ تیلونِ زُلالس دینِ یك وِ دَو

جُورِ اَفتو وُ برف پِرچست

وِ داغِ زَمونِ سیا.

#خرم_سعیدی  بهار٩٥ خورشیدی


برچسب ها: شعر نو لری ، شعر نو لری بختیاری ، شعر بختیاری ، گره گلی ، خرم سعیدی ،

تعداد کل صفحات: 3 1 2 3