تبلیغات
آیاپیر (خرم سعیدی ) - شعر بختیاری - مطالب ابر شعر نو بختیاری
یکشنبه 14 مرداد 1397

اَو بَرک

   نوشته شده توسط: خرم سعیدی    

" اَو بَرَک "

اُو سُو کِه آساریَل بیدن خَو
"شاوانو" دُودَرِ یَه دُونه مال
خُوسِ تَک بی وُ یَه مَه کِه گَوه زَی دَورِس
شاوِشایَک بِنِشَسِه سَرِ اَو .
پاپتی بال چَشمه
پا کِه اِینا وُ اِورداشت سَرِ گِل
گُل اِی دروَید وِ جاس
تا اِخَندس ، هَمُو گُمپ گُلس تیف اِی زَی
بُوِ خَندس دَرِ عَرطِس اِگُشی
کُلتِجَم خاک ولات، بُو خُوشِ اُو اِی دا
اَوِ چَشمه هَی اِتُورِست سَرِ کیف
رَنگ وُ ریِ هُونِه کِی دی منِ اَو
زَنگُلِ باد اِجُمنی همه جا حرفِ هُوبی
بُوندِیَل کِل اِی زَین
پِرپِروک دَور گلِ میناس اِی گشت
آساره رُهِ دیر
نَشمیِ ریِ هُو نی بُرد وِ ویر
لَچک الماس نماسِ اِی دی
گُلِ نوراس فرشنا، بُو اِنان مینِ چَکِس
آسمون خیفیِ هُونه کِه اِدی، شَرم اِی کِی
لِکِ اَورِ بِکشی ری تَپِ تیلونِس وُ خُوس...
دَس زَنُم ریم وُ اِگُوم وُوی تُوَه
پَیِ بیتا وُ چیا دی اِدَوِستیم وِ کیف
شَو کِه وَی ،کَه دیِ خَو
دَسِ نا ، نا همه مُون
مِنِ کُهرنگ، سَرِ رَه اَونِ گِریدن، اَمداد
خینِ سَوزی کِه اِبُردک "کارون"
تا گِرن جُون رَگ و پیوندامون
وا تَوَر زَیدن وُ رُمنینِِ کُهِ وُر مِنِ رَهس
اَوِ گِل کِردن وُ ماهی اِگِرن
مِنِ کِفتِ بِگِرین
غارتی اجدادی،دِربِدین وُر مِنِ مال
اَونِ جَرنین شُتِ زیری،بِرَسُونه خُوسه جَلد
گرمسیر تِشنه تَر اَز ایلاقِ
شاوانو ، دُودَرِ مال،لیک بِزَن دَس بِزِ ری
جُورِ " تَمتی " "گُلگیس " تُو بِکن ایلِ خَور
 
#خرم_سعیدی تابستان۹۷ خورشیدی

Ayapir2.ir
Telegram.me/khorram_saeedi


برچسب ها: شعر نو لری بختیاری ، شعر نو بختیاری ، شعر نو لری ، خرم سعیدی او برک ، شعر نیمایی بختیاری ،

شنبه 16 تیر 1397

صو مال

   نوشته شده توسط: خرم سعیدی    

" صُوِ مال "

بُرگِ شَو جُورِ کُهی پیر، پُرِ تیگ کُرَو
مِنِ آسُونه گِلیس، تش وُ برق زیده و در
خط خطی وُ خَل وُ چَل،منِ سینه آسمون رَه ای رَه
پیش زی کِه افتو،بِدراهه منِ نافِ هو کئو پیر وِ دیر
نِشتِ نُور رَگ رَگی وُ ری بالا،پَنگ ای وند منِ ری اَورا
نَرمه باد پا سِوِک اَورانِ بِروندک جَلدی
تند وُ تند وَند خَورِ سال خشینه منِ مال
مُور جلال بیله بیگ
مینِ ای مَخملِ مَرغ،جَم وُ جُورن کلِ یک
گله چارپا منِ مَرغ هی اِچَرن
یَه دنر دینِ دِر ایدن،دَورِ پُشتِ رُونا
کیونومال،کچِه پُر خال وُ مُدام دَس وِ کار
تینِمِد وّند وُ نها بالش گئپی وِ سَرس
گَپِ مال شاهُونه زَیده تِکی
مَقَلِ وَرشو وُ قُوری شانشون بَست خَورده
جَعوه زارپیشه نهاده وِ وَرس
مَجمه زیر مَقَلِ هُو،مِثِ مَه لِرک ای زَی
استکانانِ نهانِ منِ لَبتَخت قشنگ
دِشلِمه قند سِبید " مَردَشتی"
عَرطِ چُوی تازه دَمِ " کلکته" ،پیتستِ وِ مال
اما مَیلتُون نَکشا ای گَویل
چَپِه نُون تیریِ گرم، بنهاده وِ طَوَق
تُوِ شیر،کرهِ گوسِند وُ یه پاله پُرِ ماست
عاسلِ کُه پُرِ فنجون،خایه ریز کوگ چالِه
ضَئف قیلونِ پیا آماده.
حُقه بافُور،تِکی داده وِ قوری کِلِ تَش
یَه نُخود تَحلی،اِدیسنی کِرِ سیلای حُقه
یَه گُلُو تَش گَمِ مَقاش اِبِلیوست وِ دیر
بادِ مِن پُف، جَم اکی مینِ گُلُپ
نُرقه کُو ساق بافور،بنهاده گُرِ لَو،هُف ای کی
سَرِ اَنگِشت رَسی سَر تحلی وُ بِچِرنی تَهِ دل
یَه دنر دینه قِلیسنید هَمس
وِ سُکُل نِفت یواش،هُونه ای داد وِ در
دِشلِمه قند بِزی من کُپ وُ نادس گُرِ لَو ای مِتِنی
یادِ بیت مَرحومِ " داراو" وَسُم 
" کُر دونگ مده،دولت وُ دنیا وِ خومونه" ایچو

#خرم_سعیدی تابستان ۹۷ خورشیدی

Ayapir2.ir

Telegram.me/khorram_saeedi


برچسب ها: شعرنو محلی بختیاری ، شعر نو لری ، شعر نو لری بختیاری ، شعر نو بختیاری ، خرم سعیدی ، صو مال ،

چهارشنبه 9 خرداد 1397

دل دردی

   نوشته شده توسط: خرم سعیدی    

" دل دردی "
پیر دِرَهدی تَکِ تک
شاخ وُ بَلگِس بِتَکس،سرِ اَنگُست یکی دالو کُر مُرده اَوی
خُوس تَینا سر یه پا واسا، وِ کسی تِکه نَدا
پُر سَرس چال قلا
کِه ایارن همه شو شیم خور
یکی سون دوش اگو:
چقذر مین زمون وُ دَورون،لیش لیشِ وُ پِلشت
سَگَلِ مال اگوی، پر دهون سون هد ماست
سِیَلِ دَور نها،دُز میر جریت اِکی پا من مال بِنا
پاس اکردن دزِ ای بی رسوا
دُزِ ای دَور وُ زمون،شیک وُ پیک پوشه که تا
سُول گِمونی نبره گفتر ایل
گَل گَلِن جُور تَریده شَو وُ رُو
دَکل چَه کن نفتی و دَلو
تا وِ یَه سیزن کُت کنده هنو نی کنه رئم
هو وِ دین "رانت"و "دلار" هید و "زمین خواره" اوی.
تَئل تُرش اَر بیوه اَوقاتُم
هر چه قارقار اِکُنم بال اِزنم
نید حَرضَتِ سُلیمو بُوَره رَه وِ دلم
گَه گُداری جَقَلل مال ایان
بَردِلُون مُون اِکُنن تا فِر اِدیم
رَه بُریم ری وِ کُه وُ وَشت اِنیم
کُه سر ناده مِن گوش اَورا
کهخدا زاده،تکی داده وِ بالشتِ زمون
هی نیره اَوِ رُو رَه اِره
اُو گِلالِ کِرِ دَسس پُر بَرد
سَر وُ سُنگال وُ گُلالِس اسبید
برف هفتاد زمسون ،هُو قوا تازه وَرس
آساره سَرِ کُه سَر اِدُزی
نرمه نور دَم صو، ریِ برف برچ اِی زَی
کِرِ کُولِ اِشکفت، شُونِ گَله سَرِ ناده هُو وُ خُور کِرده وِ خَو
گله من قاش وِلو
هاشو وُ دال سَر مال وِ دَو
کُور کُورک کُنه خَو
بُوَره جیجه یتیم پَر مال .

 #خرم_سعیدی بهار ۹۷ خورشیدی

Telegram.me/khorram_saeedi
Ayapir2.ir


برچسب ها: شعر نو لری ، شعرنو محلی بختیاری ، شعر نو بختیاری ، دل دردی ، خرم سعیدی ،

جمعه 14 اردیبهشت 1397

مُنُوُ دل

   نوشته شده توسط: خرم سعیدی    

" مُنُو دل "
مِن بهاری کِه همه هاچق اِبُون
خُومِ تَک مَندم وُ پاهیز دلم
هیچ مَندیرِ کسی نیم، کِه بِگُوسیم " آخَی "
مُو دلم ایخُو کِه تا، بِقِلیپُم منِ تاریکی دل
رَهِ پاکی بُوُرُم
دل مو تنگ اَویده سی خُوس
مَنِشینین کِلِ یُو، وُ بِدین دلداریس
گفت وُ لُفت خُونِه هِلین سی یه دَمُون دی ایسا
دلِ مُو پُرِ پُرس، شادی وُ ناشادی هید
خُومِ تُک مّندم وُ دنیای دلم
کِه کُرور تا وِ کُرور،هَوَس وُ دادن دل لیش وُ دُرو، هُو اِی اَرزِه خُوسِ تّک
خُوم تّک هیدم وُ تینای دلم
کِه پُرِس هید قشنگی وُ بّفا، یَه رنگی
تُنه دادم وِ هَمُو  " پیر مَهمی "
نَپِرُونین خَشیِ دلِ مُونه وا یَه " پِخی "

#خرم_سعیدی . بهار۹۷ خورشیدی
@khorran_saeedi
ayapir2.ir


برچسب ها: مُنو دل ، شعر نو لری ، شعر نو بختیاری ، شعر نو لری بختیاری ، خرم سعیدی ،

جمعه 28 مهر 1396

مَلکِمیت

   نوشته شده توسط: خرم سعیدی    

" مَلکِمیت "

اَی بَرد شیر
دل دِه وِ مَتلم
مُو بَلگ زرد بلیطم
وا نم نم پُئیز
چی دال مندیرمه
خَلکن خَچه آسمون .
جیکِشتم،مین بلگ اور
وا تیغشت افتو وِ رُه کُه
چی بِنگشتی کِه بِوینه مار بَچَلس خُوره
سی تَریده ستمی کِه چی اَو رَوونه
وِ دیر ایا .

#خرم_سعیدی پاییز ۹۶ خورشیدی
 Ayapir2.ir


برچسب ها: خرم سعیدی ، شعر نو لری ، شعر نو لری بختیاری ، شعر نو بختیاری ،

شنبه 18 شهریور 1396

شو و شون

   نوشته شده توسط: خرم سعیدی    

" شُون وُ شَو "

غیرزا ویقه ککاونگی و دیر
درنگشتی نبی
دَس وُ پا اَفتو وِ پِخو
زیر بهون آسمون اسیر .
مَه وارازنیده وِ فیس
چی بهیگ،پا سر آسمون نها
تَوِه زنگ خورد آسمون پرس تِنَه .
اُردی لشکر شو
جُور هَفی دُهونِس واز سی خَوردن
اِی گُوی ملایِ مال
طلسمس کرده قَدِ بَرد.
شُون گله بال قاش
نی شیتس گُر لو
بیتا " آ داراو" خوند و درد
" چطو نفتانه بردن،چطو حق مونه خوردن"
" یُو روخونه طلاهه"
" من ملکای ایما،شو و رو ادراهه"
" اویه جور لیره،اما صحاو ای او"
"و تشنهی امیره..."
داد و قال وس و مال
گله گرگی اوی...

#خُرم_سعیدی تابستان۹۶ خورشیدی

Ayapir2.ir


برچسب ها: خرم سعیدی ، شعر نو بختیاری ، شعر نو لری بختیاری ، شعر نو لری ، شعر نو محلی بختیاری ، شعرنو محلی لری ،

چهارشنبه 25 مرداد 1396

مندیر دلتنگ

   نوشته شده توسط: خرم سعیدی    

" مندیر دل تنگ "

پِرکِ بایُم، مَسِ بارون دَم پَسین
اَفتو وُ تَپ تَپ گُروسک مین اَور
نَئره ی بی زُون نُو گُل سایِ دار
سَر تَکون اِی دا وُ اِی گُو مینِ لَو
نُو بهارونت مُوارک با گَگو
قیلِ شَو پا اِی گُشی اِی نا وِ دَو
مینِ دریا آسمون پَل زید هُو
تُولَیین مَه،دُهل زی،ساز باد
بازی دوپا سه پا گُل یاد دا
آساره جُور اَنگشتی کِه منده مین هُل
چشمک ای زَی نُمزدس اُو رُه رُها
شَو کِلِ چَشمه اِگُلنیدم تَشی مُو بالِ کُه
تَینایی دلتنگی وُ نَیشیت مَست
مُرغِ دل مَندیر،بال ای زَی بُریده نیم سَر
خارِ غم وِ لَو رَسونه،جُون وِ نِفت ای زَی وِ دَر
باغ ویرُم حُشک وا تَقدیر پیر
تاتِه تَمارزُو،تاتی تاتی کُنُون
بالِ گُور نُور بیدادی اِخُوند
دَس زَی اَقَنه ای شِرنی وِ درد
حال مردم بَد بَتر ،ریسُون چِه زرد
رنگ وُ ری افتو بُری اِز ترسِ شو
شو تُو کی ای ری ولات ایما وِ در

#خُرم_سعیدی تابستان۹۶ 
Ayapir2.ir


برچسب ها: خرم سعیدی ، شعر لری بختیاری ، شعر لری ، مندیر دلتنگ ، شعر نو بختیاری ،

شنبه 10 تیر 1396

خَوپلا

   نوشته شده توسط: خرم سعیدی    

خرم سعیدی:
"خَوپلا "
*نوعی شعر گویشی شبیه بحر طویل*

کُهِ لَو تشنه دلِ تنگ وِ گرمای توستون،بنشسته وِ کُپِ چاله صَرا کِه پُرس خارخُلونه کِه تُکه وِ جیرس خین رَوونِ وِ منِ دشت وُ بیاوون.
گَو یَو تُو بِنه بادِ چپی دِر اِخوره دَورِ سَر ایچو،بلند ایبوه چی دیو،تنیره اِکشه،کُور کُنه تیهِ هر کی کِه تیس وازه وُ قُلف ای زنه لوا،کِه وا کور بُوی وِ کَر وُ آرُم بری وُ یای ، مثِ یه کلِ دَهولی کِه یه بِنگشت نَترسه وِ وَرت مینِ زمونه.
تَش وَسه وِ ایچو،تُو اگوی دالوِ پوز بسه نشسته سرِ خَل کرده وُ واگیل جوس باد زَنه تا تشِ چالس بگره جون،وَنه دیلق وُ سُوسه کلِ ای دار وُ درهدای ولاته،گهِ گاهی،دیِ ای چاله اِره مینِ تیس سُور ابو خَرس اریزه،کنه نرفین وُ اکفنه،وُ هی سینه کُوِه،غُر ازنه کِه،کُر یاین بنیرین یُو چه روزیه کِه چی شَوِ سیاهه،همس آلیده،نفس گِر، وریسه وِ سرِ پا وُ اغارنه: هالو مُو دلم خینه وِ ای کهنه ولاتا کِه پرس نکبت و شیمه شوِ شهی منِ پوزانه گریده،کی دیده بهاری علفس شه بوه،ای گوی کِه بخونده ککاونگی وِ سرِ هر شُکه بُرگی منِ ای مِلک ، و یا رِهدنه خاک آدمِ مُرده وِ منِ  هُو،که رُومسته سرِ یک،شَوس اِز روز بتر، روز وِ شو لیشتره ایچو.... فیچم مُو وِ خو باز تیه دِونم خُومِ تک بینم و تینا،سرم اینم مث دیه  وُ اخوسم.

#خرم_سعیدی تابستان۹۶خورشیدی

Ayapir2.ir

Telegram.me/khorram_saeedi


برچسب ها: خرم سعیدی ، شعر لری ، شعر بختیاری ، شعر نو لری ، شعر نو بختیاری ، نوعی بحر طویل بختیاری ،

پنجشنبه 8 تیر 1396

پیرونی

   نوشته شده توسط: خرم سعیدی    

ﺧﺮﻡ ﺳﻌﻴﺪﻱ:
" پیرُنی "
*هرچند از عناصر شعری تهی ست،اما روزگاری بخشی از روش درمان بوده*

جاوِری خط چپ دار
سر کتاوس ور داشت
طالهس چید و بگو
دلسیا کافر کُه،نظرس کرده یونه
دو سه بلگ قاقذِ شه پیسه بکی
یُون،حَویرس بِگر وُ پارچه سوز
سَر باهی راست کُرت بند دَدُوم
دُیمینه تُو بون وُر منِ یَه پاله اَوس دِه بخوره
دِو گُلو زاگ اسبید وا دینشت
دِر بدِه دَورِ سرس وَن منِ تَش
نِمکِ نَر،مِل گرگ،سَوز مُره
اِکِنم اَوسی وُ بندم دَم هر جُمبنده
تا چهل رُو نَخوره اِسبیدی
زیر دِرهدی نگدرده وِ شُمی
چارشمبد هُو نَریزه وِ خُس اَو
وِ جدم دی نکنه پیرونی.

#خرم_سعیدی تابستان۹۶ خورشیدی
Ayapir2.ir
Telegram.me/khorram_saeedi


برچسب ها: خرم سعیدی ، پیرونی ، شعر نو بختیاری ، شعر نیمایی بختیاری ، شعر لری بختیاری ،

یکشنبه 14 خرداد 1396

دالو شو

   نوشته شده توسط: خرم سعیدی    

خرم سعیدی:
« دالو شو »

شٙو،پٙسِ هٙف کُه سِه وِ خٙو
ویر روز،بلااویده مِن باد
پشت پوست شو
آساره یٙل پیر،اسیر
جُورٍ سٙرِ بریده وِ خٙو
نورِ سِوکِ مٙه،گوش تیز ای کی
دالوی گو:
گاشه سُوار اسبید پوش،
کیونوی صُو
پاپتی وِ ای برهوت
وِ پُشت شٙو درا
مین میدونِ شُمشیر شیون خین.

#خرم_سعیدی خورداد۹۶
Ayapir2.ir

Telegram.me/khorram_saeedi


برچسب ها: خرم سعیدی ، دالو شو ، شعر نو بختیاری ، شعر نیمایی بختیاری ، شعر نو لری بختیاری ،

یکشنبه 13 فروردین 1396

غم شون

   نوشته شده توسط: خرم سعیدی    

ﺧﺮﻡ ﺳﻌﻴﺪﻱ:
« غم شون »

دٙوٍ دٙس تنگی زِمین وُ اُو شٙوا پهن وُ فراغِ ای زمسون دِی رٙه
تٙرکی سردِ بهار،کُم شٙون،جِر ای دا
دٙم صُو داشت ابی رُستم زا (۱)
سٙر وُ کُول همه جا بِر ای زی
پیش پا صُو کِه نُک کُه بپِره
تیه چشمه اگشی وُر مٍن دشت
دل تنگ آسمون،گُلس هی واز ای بی
هیرد هیرد،گاه اِری خرس تیه.
شٙوچٙری،میسمِ میسون چارنی دی سٙر اُوی
شُون گله نِ اٍرُوند،مین علفچر کِه خٙری بی اٙرباو
پٙریون،کاردیم کالی وِ وٙرس،تُند کی پا
خٙر وُ شله نٍ اورد مین بکال گوشه قاش
تٙش وُتُنگی کِر اِشکفت بِنا هُو واکار
دٙس وِیرد،پاتیل شه نه بکشی اِز تُربه
بُز کالی کِه بِکِی تیشترزا،شیر جِک دُو وُ بکی راس لِوی
کُه تٙش هی ابلیوست وُ اچرنی وِ هوا
کِتری سِه وِ کِلس لُق ای کند
دٙس گرم کی کُپِ چاله وُ وُلانی وِ یک وُ کیف ای کی.
شُون غارنی کُوْ تُو کینی کِه وِ دیر داری ایای
سگِ هُشکُو هُو بکی،ناد وِ دٙو رٙه وِ جلو
سگ صحاوس اٙشنی،دیم نا وُرمنِ کا دُونگ ندا
پا وِ پا صاحوِ سایه هُو اُوی ری وِ گله.

#خُرم_سعیدی سیزده فرودین ۹۵


برچسب ها: خرم سعیدی ، غم شون ، شعر لری بختیاری ، شعر نو بختیاری ، شعر نیمایی بختیاری ،

پنجشنبه 10 فروردین 1396

بٙزیٙر ۲

   نوشته شده توسط: خرم سعیدی    


«بٙزیٙر ۲»

شٙوکُله نِ وٙرداشت
شال کٙد سست ای کی
سرِ وِرد سایه بٙنه
داسِ وا نُک زٙی گِل
ریس اِی گُوی تٙشک زیده انار
جُور مُور بی دینِ کار.
گِلی مٙشکِ گِری
اٙو قلا دٙریز کی
غُلغُل اٙو مین گِلی
قُرقُریس ای جُمنی
اٙو‌ وِ چیرٙوِ شُکه
دیم سِویلس ریسس
تٙهر اکی گٙردنسه کیف ای کی.
ای نیشت وا افتو
حُشک کی وا اُفتین
عرقِ بین دُو بُرگ
زیر لٙو هی ای خوند:
« گٙره وُ گٙرما»
«ای بی داد هی» 
« دلم زمنده»
« هر کی که گرنه کاشت»
« دا دا دا»
« نهلس نمهنه.....»
#خُرم_سعیدی    

Telegram.me/khorram_saeedi


برچسب ها: خرم سعیدی ، بٙزیر ، شعر نو بختیاری ، سعر نو لری بختیاری ، شعر نیمایی بختیاری ،

جمعه 20 اسفند 1395

مال چواسه

   نوشته شده توسط: خرم سعیدی    


« مال چواسه »

جُورِ بازبازک اِبازن شِو وُ رُو
آسمون واز وُ فراق
شٙوِ پر رازِ نهاده سٙرِ شُون
جُورِ « هرکول» زمون.
دیِ شو بال اِگُشه
یابو آسارنه بٙسه سرِ سٙرد آخورِ کُه
لچک الماس نما نادِ وِ سر اِی دٙونه
شٙوکُله مٙه نِه نهاده گُر سر فیس اِکُنه
وا لِورگ باد صٙوق
گرگ لُوق ناد وِ دٙو
غولِ سایه وِ شتاو ای ورگشت
کاکونگ زیر شُکه
داغ دل ایخونه
یُو چِه مالیه دیه
کِه چنو دٙمبٙرده
همه چیس هید چواسه ایچو
ظلمونی بگریسونِ وِ چی «اسکندر»

#خُرم_سعیدی ۹۵خورشیدی
Telegram.me/khorram_saeedi


برچسب ها: خرم سعیدی ، شعر نو لری بختیاری ، شعر نو بختیاری ، شعر نو لری ، مال چواسه ،

پنجشنبه 14 بهمن 1395

آسمونی مردم

   نوشته شده توسط: خرم سعیدی    


«آسمونی مردم»

خٙوٍ خال خیالت
غُوار غم ریزه وِ دلِ بی قرار
اٙی بی سوزه زار،زمستونی بهار
دِهون تفنگت بی فریاد داد
لشکر اور کورت،سوار سینه کُه
سر گرم بازی سایه وُ زِمین
چی گله گرگی اٙویده وِ رٙم
بادِ بادلوی آواره بیاوون 
بی گرت لیله وِ دٙو
اِژدهای شو وُ کُه دٙس داده یک
چی دالوی پوز بسه و قهر
دشنت نشسه و پوست سینه
وا غیظ و غضو
خوشی مردم خورن
مین ای زمون شیم.

#خُرم_سعیدی زمستان۹۵خورشیدی


برچسب ها: شعر لری ، شعر بختیاری ، شعر لری بختیاری ، شعر نو بختیاری ، خرم سعیدی ، آسمونی مردم ،

چهارشنبه 8 دی 1395

خو شو

   نوشته شده توسط: خرم سعیدی    


«خٙوِ شٙو»

مار،سٙر گنج وٍ خٙو

کُم پٙتی گُسنه صِحاو

گِرگٍ گِرگ شُون وِ گُوش

سگ وُ گُرگ دادنه سٙرخٙط وایٙک

گُوسیل وِل مِنِ قاش

کخدا مال ندونه کِه تٙریده کِلِ مال خٙو کِرده

وِ مُو گوده یه گگو

مٙر نٙدونی ای کُر

« کهخدا پٙسبٙرکه»

تٙرس وُ تُرسا سٙرِ جا .

شٙو اِگُوی پا پِخٙوه

کی اِبُو اُو گُویِ سُور

چند گُمبک بِزنه

جُل شونه بکنه


برچسب ها: شعر لری بختیاری ، شعر نو بختیاری ، شعر نو لری ، خو شو ، خرم سعیدی ،

سه شنبه 15 تیر 1395

غیرتی كر

   نوشته شده توسط: خرم سعیدی    



"ِ غیرتی كُر "

پِچ پِچی وَس وِ مال،كِه عَرو وَی سَرِ مرز

وِ شُمی تا دَمِ صُو لیز نَكِی

تَپِ تیلُون اِسپارد

دَس زینه وُ بِگُو

جُون تُو وَ جُون بَچَلُم

وِ همه ایل بگو،كِه حلالُم بكنن 

روز چی باد گُدشت 

گُم گُم تَول ای جنگ 

كَر كِی گوش جهون 

یَه چَوی پِشخ اَوی

كُر فُلونی كِه بِره جَنگ نُتُومِه 

بعد چَن سال اِوردن لارس 

كُتلی وارازنین 

نان واكار دُو دَس سازِ چَپی

زِنگَلِ مال،اَقه دِردن وُ بُریدن پَل سیس 

دالوی خُوند سُرو

" مُو بِمیرم سی كُر "

"سَرِ قَدس نید كِه دی " 

" چی نها هُمسرِ زینس بیوه "

#خرم_سعیدی تیر٩٥ خورشیدی


برچسب ها: شعر لر ، شعر لری بختیاری ، شعر بختیاری ، شعر نو لری ، شعر نو بختیاری ، غیرتی كر ، خرم سعیدی ،

یکشنبه 13 تیر 1395

تیه كال

   نوشته شده توسط: خرم سعیدی    



" تیه كال "

بلیطِ كال،سی ندار 

هُم بغلِ گُسنهیه 

جون وَرگرنه 

مِن سال قحط 

بَشخشِ پا طنافِ دار.

تیا كالت، بَلیطن 

تا جُونم وِ تاراج نَره .

اما، تیات سی دَولتمند 

عیسِ آسمونه وُ رُوِ رَوون 

چشمه زلاله وُ بُنگِ كوگ 

اَفتوِ وُ هِزارونِ دیه .

اما تیا كالت سی مو

بَلیطِ كالِ جُون وَرگرنن 

تیه كال. 

#خرم_سعیدی تیر ٩٥ خورشیدیِ


برچسب ها: شعر لری ، شعر لری بختیاری ، شعر نو لری ، شعر نو بختیاری ، خرم سعیدی ، تیه كال ،

جمعه 28 خرداد 1395

گلامون

   نوشته شده توسط: خرم سعیدی    

خرم سعیدی:
" گِلامُون "

گِژ گُپِ شِئر پُكست 

بُو رُو گُلاوِ دَرد 

پِیتِستِ مِن وِلات

گُنگِ زَمونه مُون 

بُرِن زَوون وِ زُور 

دُوزن لَوان وِ قَهر 

دِرِن وِ ضَرب گُرز 

سَرخطِ گَوگرى 

مِین ای قفس دیه 

مُرغِ نَفس بمُرد 

اِز زادِ پِسه سَر 

پِرِسته هُوشِ وُ گوش 

گاشه كِه یَ وُلا 

كیخسروی پیا

وادیرمون بیا

یا یَ حكیم خُو 

جُورِ " بزرگمهر "

پُكنه كُرَو وِ دل 

خارِ جیر كشه  

یا جاوَنه دیه 

هُوشِ گُرودَنِ 

تا دِشمِنون خِجل 

وابُون وُ ناكسون.

#خرم_سعیدی بهار٩٥


برچسب ها: شعر نیمایی لری ، شعر نیمایی بختیاری ، شعر نو لری ، شعر نو بختیاری ، گلامون ، خرم سعیدی ،

جمعه 17 اردیبهشت 1395

درد بی دردی

   نوشته شده توسط: خرم سعیدی    

" درد بی دردی"

دشتِ كالِ دلِ مال
چی هَف بند رُو وِ نال
پامالِ زَمونِ ویرُون
سی بی دردیِ وَسه وِ ایل
گُلای دردِ كُهِسُون
غمِ كورِ دل وِ آسمون رَسوند
سی خین حُشك اَویده گَوگرى
دلِ شیر اَو اِی بی وِ زادِ اِی درد.
#خرم_سعیدی بهار٩٥


برچسب ها: شعر نو محلی بختیاری ، شعر نو بختیاری ، شعرنو لری ، شعر بختیاری ، خرم سعیدی ،

دوشنبه 5 بهمن 1394

دنگ زمونه

   نوشته شده توسط: خرم سعیدی    

" دنگ زمون "

نورِ نیمه جون،آروم

جُورِ بَرد گِلال،بی دُونگ

وِ چنگِ آسمون گُرو.

دیوارِ كُورِ تا اَبَد شَو

چی دالِ گُسنه،دیُون گُشی

مُستِ دُرشتِ كُه

پِنَه بیاوون

دَر حُونه زُمینِ اِی كُفت وِ راز

دیونِ شَونِ ای بَفت

آسمون وِ كُه ای نیشت

كُه وِ آسمون

درد،من سَرسُون ای پیتست

هَر دُو سُون،غَریونه غَم وِ دِلن

وِ دَنگِ زَمونه.

" خرم سعیدی زمستان٩٤"


برچسب ها: شعر نو لری ، شعر نو بختیاری ، شعر نو لری بختیاری ، دنگ زمونه ، خرم سعیدی ،

تعداد کل صفحات: 2 1 2