چهارشنبه 15 آذر 1396

ویر ولات

   نوشته شده توسط: خرم سعیدی    

« ویرِ ولات »

خاک بِپُوشی خُوسه،چی پَرِ کَوگی پُرِ، چادر چیتی وِ سر،نی نُقطی وِس دیار

جُووه سَوزی وَرس،تُر خُوره اَو سَر دلس،دار وُ دِرهدا پُرس،مَرغ سَرِ مرغزار

دار وُ دِرهدا همه،پِرک کُنن چی رَمه،سَر اِ کَشن ری هوا،بی حَدِن وُ بی شمار

باد اِ دَونه وِ نال،جُورِ عطار بالِ مال،پِشخ کُنه قیل وُ قال،ریزه هُو بوی بهار

سُور گُل وُ زَرد گُل،زیده وِ دَر دَورِ تُل،سیل کُنن آسمون،عَیسنِ بینن دِیار

تُک کُنه اِشکفتِ کُه،پِز اِده پَس بَردِ هُو،جَم اِبـوه مِن هَرو،او سِه بَرن بار بار

تا کِه تیه بُر کُنه،هید زِمین سَوزه زار،یا اِ بِلیوه گُلی،بِرچ اِ زَنه کُول کِنار

چَند بهون بالِ اَو،صَف بِکشیدن وِ خَو،مَشک وُ ملاری وِ دَو،دُو اِ زَنن بیقرار

شُون اِ چارنه هَمس،گُو سیلس دَورِ وار،پُک سَرِ کُه وُ کَمر،هید هَمس مَرغ زار

جُورِ ستاره وِ دیر،تَش کِلِ قاش اِی بلیو،هُف کُنه هَف بَند هُو،خُوند وِ یکیس یار یار

کُر تُو بِنه آسمون،وا سَرِ مِن رُو رَوون،تُر اٌ خُوره وا گِلُو،اَو اِ بَرس سایه دار

یَه گله کَوگ مینِ وَشت،واتَک وا دَو گُدشت.قهقه خَندس وِ رَو،ویره بَره حُونه یار

پازَنِ کُه وا سُرو،غُف وِ بَرفتو چُنو.اُردی خانن هُنُو،هیچ نیان وا شمار

بَرف وِ داغِ بهار،خَرس اِ ریزه کِنار،جُور بَهیگ خین بسی،هَف به رَهده وِ چار

زیرِ سُمِ اسب اَور،تَش زَنه دَر رَو وِ رَو،قاصدِ باروون وِ دَو،جَلد اَوی دَسِکار

کُه کِه اِیا وادیار،نَئمتِ هُو بی شمار، پُشتٌ کَدِس بَسه بی جُورِ بَهیگِ بهار

مِن رَگ وُ دِل یا تیام،خین نَه وُ صَور وُ نَه خَو،ویرِ ولاتِ وِ جُون،جُورِ تَشِ مِن پیار

#خرم_سعیدی پاییز۹۶ خورشیدی
Ayapir2.ir


برچسب ها: خرم سعید ، شعر محلی بختیاری ، شعرلری بختیاری ، ش ، شعر به زبان بختیاری ، شعر به زبان لری ،

یکشنبه 15 مرداد 1391

خَوَر

   نوشته شده توسط: خرم سعیدی    نوع مطلب :شعر نو محلی بختیاری ،

چَو

اَور، چادُر کُهنه دِردِه ری سَرس

وِ رَهِ دیر وُ دراز

 سینه کَش کُه اِی وَی اِ کَشی خُن بالا

بَرق اِی زَیس شَلاق

کِه بِکُن تُند وِ پا

مِنِ حُورجین شَهِ شِره دِرِه

دیه بارونی نی

باد ، ای راز بداده دَمِ باد .

*****

شَو ، اَفتونِ  کَشون کَشون

 اِی بُردجُورِ غولِ بیابون وِ گُول

اَفتو وِ ترس رنگِ رینه باخته بی

سَرِ سِپُرد وُ رَه

 زیر چادرِ سیا

شَو ، نادرِ وَرگشته وِ جنگِ هِند

مغرور وُ سر بُلند وا لشکرس رسی

اُردی بِزیده بی

*****

 ویقه بُلند اِزی ، مُرغی وِ ترسِ شَو

جایی پَنَه گری

گاشه روای پیر ، جیتِس گِریده بی

مین مَرغلون شَو

مَرغِ  شَهی هَمس ریشه دونده بی

چیلونگری اِخوم

وا هَستِ جُونِ خُوس

داسی بِسازه سیم

*****

اَی باغِ دِل بیو

تُن شیرِ دات وُ اُو اَفتوی شا وِ شات

ریمه مَون وِ گِل ،بَختِ بَوو خُوت

واکُن یَه چاله ای مین آسمونِ شَو

دِی کُهنه کینه ها ن

اَوشون وِ زِیر گِل

شُومی بِزن هُنه

وا خینِ مین خوت

اَو دِس تُو یه دَمون

گاشه یه روزِ دی

وابو یَه علفی

سی یابُوی ، بُزی

                                بندر عباس –مرداد91 (خرم)


برچسب ها: شعر لری بختیاری ، شعر نو محلی بختیاری ، شعر به زبان بختیاری ، خرم سعیدی ، خَوَر ،