دوشنبه 29 تیر 1394

دردینه شهرام

   نوشته شده توسط: خرم سعیدی    نوع مطلب :شعر لری بختیاری ،

"دردینه شهرام  "

 

چُپ چُپی وَسه وِ مِینِ اِیرون

شاپیائی کُرِ بی دا ، " شهرام"

چی "سیاوش" تَشِه وَسه مِنِِ "مارونِ" بَغل کِی بُوسی

کاریَرون "شرکتِ نفت"، پَین اَنگُس وِ دِیون هیرونن

خُودِ تَش، هَم وِ خِجالت وِ اَبد ری زرده

پَلِ سُورِ بِوُری،ریس سیا، سی اِی پیا

سُوریِ اُو اَوِ دریایِ هَمس فارس

 وِ خَرسِ ماهییه سی " شهرام"

لیک وُ چِر وُس وِ ایل وُ مِنِ کُه

میشکالون اِزَنن ساز چَپی

کُتل آوی  "اَلهک"

مَه بِکند ریسه و پَل دادِ دَمِ اُو شَوِ شَه

اَقِه اِز دَرد بِدِرنی "مُنگشت"

"کُولفره" کِرده بَغَل واز وُ اُوی سی پیشواز

کُله کَنده وُ زَنه وا سَر وُ مِن ری " چیوه"

"مالمیر" سی کُرِ خُوس اِی زَنِه زال

کُلَوی کِین وِ سَر، " زرده"و " سَوزو" وُ " کَلار"

مَه وِ چی بَزگرِ ماتی بُوُریده کِمَرس

آسمون اِز غَمِ تُو زَیده وِ سَر چادر شَه

اِ غِرمنه وِ غَمِ تُو "کارون" هَی اِیگو

شاپیائی مثِ "شهرام" نیا مِن ایرون

خرسِ ایل شَوشته ری اَفتو وُ مَه

گُمبِ گُل سُور اَوی، تا تَشه لارت دی

پُشتِ بُورگِ کُلِ آساره نِشَسه غَمِ تُو

می مِرزِنگِ ستاره مُل وُ شُون داده وِ یک

 شَوِنِه شَه اِ کُنه اِز غَمِ تُو

کَوگِ دَر،پا وُ نُوکه زَی مِنِ خین "شهرام"

نُومِ نَشمینِ هُونِه هَی مِنِ کُه جار اِزنه هَی اِیگُو

چی تُو کمتر کُرِ بی دا دی اِیا مِن دنیا

شیر مِردی مثِ "شهرام"دیه نی گِره پا

نُومِه تِه فِر اِدهه تا بِرسُونه وِ جِهون

نَشقِ ویر تُو وِ کُه و کَمرا مَهنه هَمس

تا بُوه اَفتو وُ مَه ،یَه نِشونی وِ سی ایرونه

نُوم دَرآوردی وُ دَورون ،کِه بدهکارِ تُونه

بَختیاری هَمه جا جُورِ نِها،سَر بُلنده وِ نُمت

شیر پیا، اَی کُرِ بی دا " شهرام"

 

 


برچسب ها: شعر لری بختیاری ، شعر محلی بختیاری ، شعر لری ، دردینه شهرام ، خرم سعیدی ،